Cua posibilidad di escogencia tin?

NPR 2014 ta ofrece diferente posibilidad cu bo por scoge pa asina bo por adapta bo pensioen na bo situacion y deseo personal. Aki bou nos ta duna bo un bista di diferente posibilidad pa scoge for di dje. Bo mester haci e escogencia 6 luna prome cu bo baha cu pensioen.

Baha cu pensioen mas trempan of mas laat

Bo por pidi APFA pa bo baha cu pensioen mas trempan. Esaki por, cuminsando for di bo 60 aña. Bo pensioen lo bira menos. Tambe bo por scoge pa baha mas laat cu pensioen. Bo pensioen lo bira mas halto. Bo por keda traha te maximo 70 aña. Bo acumulacion di pensioen si ta stop na 65 aña. Si bo ta desea di sigui traha mas largo bo dunado di trabou mester bay di acuerdo si cu esaki.

Lesa mas di esaki na: Ki ora mi por baha cu pensioen?

Pensioen parcial

E areglo di Pensioen NPR 2014, ta duna bo e posibilidad pa baha cu pensioen parcialmente y sigui traha parcialmente. Esaki por desde bo 60 aña.

Supone cu bo bay cu un pensioen parcial di 2 dia pa siman y bo keda traha pa 3 dia. Pa e dos dianan liber bo ta baha mas prome cu pensioen y pa e tres dianan cu bo ta traha bo ta keda acumula pensioen. E pensioen den su totalidad ta bira un poco mas abou pasobra bo ta adelanta un parti di bo pensioen. Pensioen parcial ta un bon posibilidad pa cuminsa traha menos y custumbra cu e pensioen.

Ora cu despues, e fecha aplicabel pa bo baha cu pensioen yega, bo ta bay cu pensioen full-time. Bo lo no por pospone bo pensioen tampoco mas. Bo mester pidi e pensioen parcial 6 luna prome y bo dunado di trabou mester ta di acuerdo cu bo peticion.

Cambio di pensioen di viudo/viuda pa un pensioen di biehes mas halto

Na APFA bo ta acumula pensioen pa bo mes y un pensioen di viudo y viuda. E areglo di pensioen ta ofrece bo e posibilidad pa cambia e pensioen di viudo y viuda completo of mita, pa un pensioen di biehes mas halto. Bo por considera esaki si bo no tin un partner  of si bo partner mes tin un bon pensioen na su doño di trabou. Corda si cu si bo cambia e pensioen di viudo/viuda completo of parcial, cu bo partner lo no ricibi of ricibi hopi menos pensioen di viudo/viuda despues cu bo fayece. P’esey bo partner tambe mester ta di acuerdo cu e cambio aki.

Cambio di pensioen di biehes pa un pensioen di viudo/viuda 

Di otro banda tambe, bo por cambia parti di bo pensioen di biehes pa un pensioen di viudo/viuda mas halto. Por considera esaki si bo ta desea pa bo partner ricibi un pensioen di viudo/viuda mas halto despues cu bo fayece. Na momento di haci e escogencia aki e haltura di pensioen di viudo/viuda no por ta mas hopi cu e pensioen di biehes reduci.

Construccion halto/abou

Bo por scoge unicamente un biaha pa ricibi un pensioen mas halto durante e prome añanan y despues un pensioen mas abou. Esaki bo por considera si bo ta pensa cu e prome añanan cu bo ta cu pensioen bo lo tin mester mas placa. Bo por scoge pa e prome 5 of 10 añanan di bo pensioen pa bo haya un entrada mas halto y despues un entrada mas abou. Esey ta nifica cu e entrada mas abou lo ta 75% di e entrada mas halto.

Stichting Algemeen Pensioenfonds Aruba
Seroe Blanco 4, Oranjestad, Aruba
T.(297) 525 2732 F.(297) 525 2727
info@apfaruba.org