Ki tempo mi por bay cu pensioen?

Gobierno a dicidi cu e edad di Pensioen General di Biehes (AOV) lo aumenta gradualmente entrante 1 di januari 2015. E dunado di trabou y e sindicatonan a dicidi cu edad di pensioen di APFA lo aumenta na mesun manera cu AOV entrante 1 di januari 2015.  E suma di pensioen cu bo a acumula lo no cambia. Solamente e pago di pensioen ta cuminsa mas laat, es decir desde e edad di pensioen valido pa bo. Den e tabel bo por wak kico e edad di pensioen pa bo ta entrante 1 di januari 2015.

Edad di pensioen di APFA y alabes edad di pensioen di AOV

Fecha di nacemento

Edad di pensioen

prome cu 1 di januari 1955

60 aña

di 1 di januari 1955 te cu 30 di juni 1955

60,5 aña

di 1 di juli 1955 te cu 31 di december 1955

61 aña

di 1 di januari 1956 te cu 30 di juni 1956

61,5 aña

di 1 di juli 1956 te cu 31 di december 1956

62 aña

di 1 di januari 1957 te cu 30 di juni 1957

62,5 aña

di 1 di juli 1957 te cu 31 di december 1957

63 aña

di 1 di januari 1958 te cu 30 di juni 1958

63,5 aña

di 1 di juli 1958 te cu 31 di december 1958

64 aña

di 1 di januari 1959 te cu 30 di juni 1959

64,5 aña

Riba of despues di 1 di juli 1959

65 aña

Baha cu pensioen mas trempan of mas laat?

E posibilidad ta keda pa baha mas trempan of mas laat cu pensioen. Den e menu na man robes bo ta haya mas informacion di esaki na ‘Stop di traha’. Corda si, cu si bo ta desea di baha cu pensioen mas trempan, bo mester entrega bo peticion na directiva di APFA 6 luna prome cu e fecha desea di baha cu pensioen. Si bo ta desea di bay mas laat cu pensioen mester informa APFA tambe via bo dunado di trabou 6 luna prome cu e fecha cu bo ta desea di baha cu pensioen.

Cuanto pensioen lo mi ricibi?

Tur aña bo ta ricibi un relato di pensioen unda bo por mira cuanto bo por bay spera di ricibi ora cu bo baha cu pensioen.

E factornan mas importante cu ta determina e suma di bo pensioen ta; bo salario y e cantidad di aña di servicio. Mas halto bo salario ta y mas tempo bo ta trahando den gobierno of na un dunado di trabou afilia na APFA, mas halto bo pensioen lo ta. Aki bou bo ta haya un ehempel di calculacion di un pensioen.

Nos ta cuminsa cu e salario cu ta conta pa bo pensioen. Den e areglo ta para bon cla kico ta conta of kico no. Mayoria biaha e ta 12 biaha bo salario mensual bruto.

Pa tene cuenta cu e AOV cu bo lo bay ricibi di gobierno, nos ta deduci e suma di e salario. E suma cu nos ta deduci di e salario nos ta yama e franchise. Tur aña ta adapta e franchise segun e suma di AOV. Pa 2016 e franchise den NPR 2014 ta Awg. 17.616,=. Loke ta resta ta e base di pensioen. Esaki ta e base pa calcula bo pensioen. Nos ta multiplica e base di pensioen cu e porcentahe di acumulacion. E porcentahe di acumulacion ta e porcentahe di bo base di pensioen cu bo ta acumula tur aña. Pa  NPR 2014 e porcentahe di acumulacion ta 1.75%.

Bo base di pensioen multiplica cu e porcentahe di acumulacion ta pues e suma cu bo ta acumula na pensioen pa aña. Loke bo a spaar durante tur bo añanan di trabou servicio hunto ta e pensioen cu lo bo ricibi pa aña pa resto di bo bida, cuminsando na e momento cu bo yega bo edad di pensioen.

Ehempel di calculacion:
Laga nos ilustra esaki cu un ehempel. Nos ta tuma un persona cu un salario bruto pa aña di Afl. 50.000,=. E calculacion ta bira:

Salario cu ta conta pa pensioen

 Afl. 50.000

 Desconta franchise

 Afl. 17.616 –

 Base di pensioen

 Afl. 32.384    x 1,75% (porcentahe di acumulacion) = Afl. 566,72

Pa facilita e ehempel laga nos sali for di e punto di bista cu e salario di e trahado aki semper ta keda Afl. 50.000 – loke en realidad no lo ta asina – y cu e trahado lo traha 40 aña.

E suma di pensioen ta bira: 40 x Afl. 566,72 (acumulacion pa aña) = Afl. 22.668,80 pa aña.

Tin diferente otro factor cu por influencia e suma di bo pensioen. Si por ehempel bo ta traha part-time, lo adapta e pensioen na esaki. Supone cu abo semper a traha part-time 50% di tempo, e ora bo pensioen tambe lo ta 50% di loke bo lo a cobra si bo a traha full-time. Tambe diferente posibilidad di escogencia den e areglo di pensioen por tin influencia riba e suma di pensioen.

Stichting Algemeen Pensioenfonds Aruba
Seroe Blanco 4, Oranjestad, Aruba
T.(297) 525 2732 F.(297) 525 2727
info@apfaruba.org