Kico ta pensioen

Pensioen ta e entrada cu bo ta gosa di dje ora bo baha cu pensioen. Bo pensioen ta inclui tambe un pensioen di viudo/viuda y huerfano despues cu abo fayece. Si na momento di bo fayecimento bo tin yiu menor di 18 aña, e ta ricibi un pensioen di huerfano. Si bo yiu ta studiando ainda, e por haya pensioen di huerfano te cu 25 aña. Si bo ta incapacita pa traha durante un periodo largo tin un pensioen di invalidez.

Aruba conoce un sistema di pensioen cu tres pilar. Hunto e tres pilarnan aki ta forma bo entrada di pensioen. E prome ta e Pensioen General di Biehes (AOV), e di dos ta e pensioen cu bo a acumula via bo dunado di trabou ( APFA) y e di tres ta loke bo mes eventualmente a acumula extra pa bo biehes.

AOV

AOV ta abreviacion di Algemene Ouderdomsverzekering, esta Pensioen General di Biehes. Esaki ta e pensioen cu tur habitante di Aruba ta ricibi for di gobierno. No ta importa si bo a yega di traha of no. Bo tin derecho riba e pensioen aki na momento cu bo yega e edad stipula pa ley pa ricibi e pensioen.

Desde 1 di januari 2015 gobierno gradualmente a hisa e edad di pensioen di 60 pa 65 aña, durante un periodo di 10 aña. Cu otro palabra: entrante 1 di januari 2015 e edad di AOV ta 60,5 aña y ta keda subi cu 6 luna cada biaha te na 2024. Cuanto pensioen di AOV bo ta haya ta depende si bo ta casa y pa cuanto tempo bo ta inscribi den Registro Civil na Aruba.

E AOV ta regla den e Ordenansa di Seguro General di Pensioen di Biehes. E instancia cu ta ehecuta e ordenansa aki ta Banco di Seguro Social (Sociale Verzekeringsbank).

Pa mas informacion bo por bay riba website di SVb, www.svbaruba.org

Pensioen di Fondo General di Pensioen Aruba (APFA)

AOV ta e base di bo pensioen. Riba esaki bo ta ricibi un pensioen adicional cu bo a acumula via bo dunado di trabou. Si bo ta trahando den gobierno (of un organisacion afilia na APFA) bo ta acumula pensioen na APFA. Pa esaki abo y bo dunado di trabou ta paga un prima tur luna. APFA ta maneha y inverti e placa durante e periodo cu abo ta trahando y ta paga esaki ora bo baha cu pensioen. E palabracionnan tocante e pensioen ta hancra den e Areglo di Pensioen. APFA actualmente ta manehando un Areglo di Pensioen: e Reglamento Nobo di Pensioen 2014 (NPR 2014). Por ta prome cu bo a drenta den gobierno bo a traha na un otro caminda caba y bo acumula pa pensioen ey tambe. E ora bo ta haya esaki banda di bo AOV y bo pensioen di APFA.

Extra Pensioen door di acumula pensioen individualmente

Banda di e pensioen di biehes (AOV) y e pensioen cu bo a acumula via bo dunado di trabou, bo mes boluntariamente, por acumula un pensioen adicional. Esaki por entre otro na un banco of via un seguro di bida. Bo por haci esaki si por ehempel tin un kiebro den bo acumulacion di pensioen door di a keda sin traha of si bo ta divorcia. Tanten cu bo keda den e reglanan fiscal, bo por kita e prima extra aki for di e entrada cu ta cobra impuesto riba dje.

Stichting Algemeen Pensioenfonds Aruba
Seroe Blanco 4, Oranjestad, Aruba
T.(297) 525 2732 F.(297) 525 2727
info@apfaruba.org