Fayecimento

Si bo fayece, bo partner ta ricibi un pensioen di viudo/viuda, si bo matrimonio of contracto di concubinato a tuma luga prome cu e fecha di bo pensioen of retiro. Pa bo yiunan menor di edad of yiunan cu ta studiando ainda, tin un pensioen di huerfano te 25 aña.

Pensioen di viudo/viuda

Si bo ta casa of bo tin un partner cu kende bo tin un acta notarial di concubinato, bo partner tin derecho riba un pensioen di viudo/viuda, ora bo fayece. E condicion ta cu bo a casa of cera e contracto di concubinato prome cu e fecha di retiro of e fecha cu bo ta baha cu pensioen.

Si bo fayece na momento cu ainda bo ta den servicio di bo dunado di trabou, bo partner tin derecho di ricibi pensioen di viudo/viuda cual ta 5/7 parti di e pensioen di biehes cu bo lo por a acumula si bo a keda den servicio te na bo edad di pensioen.

Si bo fayece despues di bo retiro pero ainda bo no ta cu pensioen, bo partner ta haya un pensioen di viudo/viuda cu ta 5/7 parti di e pensioen di biehes cu bo a acumula durante bo añanan di servicio.

Si bo fayece despues cu bo a baha cu pensioen, bo partner ta ricibi 5/7 parti di e pensioen valido pa bo te na e momento ey. E pensioen di viudo/viuda ta drenta na vigor riba e prome dia di e luna cu ta sigui e fecha di bo fayecimento. Ta pagu’e te e ultimo dia di e luna cu bo partner a fayece.

Pensioen di viudo/viuda extraordinario

Bo ex-partner tin derecho riba un pensioen di viudo/viuda extraordinario na momento cu bo fayece. Esaki ta mita di e pensioen di viudo/viuda cu bo a acumula durante e matrimonio of e contracto di concubinato.

Pensioen di huerfano

Ora bo fayece bo yiunan soltero tin derecho riba un pensioen di huerfano te na e edad di 18 aña. Pa yiu soltero cu ta studiando ainda of door di malesa of handicap no por genera suficiente entrada pa nan cuido, e limite di edad ta 25 aña.

Como yiu tambe ta (conta) yiu politico, di criansa of adopta. Esaki ta conta tambe pa e yiunan, cu pa ley tin un deber di mantencion imponi riba e participante di e fondo di pensioen. E pensioen di huerfano pa cada yiu ta 1/7 parti di e pensioen di biehes cu bo por a acumula si bo a keda traha te na edad di pensioen.

Ora bo fayece despues di bo retiro pero bo no ta cu pensioen ainda, e pensioen di huerfano pa cada yiu ta 1/7 parti di e pensioen di biehes cu bo a acumula durante bo añanan di servicio. Si bo fayece despues di bo edad di pensioen y ainda bo tin yiu cu tin derecho riba pensioen di huerfano, e ta 1/7 parti di e pensioen cu bo tin derecho riba dje. Si bo yiunan a perde tur dos mayor, ta redobla e pensioen di huerfano pa 2/7 parti pa cada yiu. Esaki ta conta tambe si tin un mayor na bida ainda pero e no tin derecho riba e pensioen di viudo/viuda. Tin un maximo na e pago total di pensioen di viudo/viuda y pensioen di huerfano hunto. E reglanan pa esaki ta para den NPR 2014.

Informa APFA

Ta importante pa bo famia informa APFA di bo fayecimento. Pa haci esaki nan mester entrega un acta di fayecimento. E ora APFA por paga e compensacion di fayecimento y e pensioen di viudo/viuda y huerfano.

Stichting Algemeen Pensioenfonds Aruba
Seroe Blanco 4, Oranjestad, Aruba
T.(297) 525 2732 F.(297) 525 2727
info@apfaruba.org