Kico ta maneho di inversion?

Na momento di defini e miho maneho di inversion ta uza entre otro e asina yama estudio di Asset Liability Management (estudio ALM). Den e estudio ALM ta haci prognostico riba termino largo di e inversionnan (assets) y e obligacionnan di pensioen (liabilities). Esaki encera mas cu 1.000 scenario cu mester wordo calcula. Asina ta haya un bista di kico e efecto ta di por ehempel cambio di e portafolio di inversion riba e obligacionnan.

Como un instancia financiero grandi, APFA ta haya cu e tin un responsabilidad social grandi. Esaki ta refleha tambe den su maneho di inversion. Esey ta mustra tambe cu APFA ta duna hopi importancia na inversion local. Door di financia proyecto na Aruba, APFA ta stimula economia Arubano. 

Responsabilidadnan

Directiva di APFA ta responsabel pa un bon ehecucion di e maneho di inversion. Conseho di Supervision ta stipula e maneho di inversion. APFA ta selecta y monitor e inversionnan local y den exterior. Ta hinca e inversionnan di exterior den Russell Investment. E compania aki ta un inversionista specialisa cu conocemento mundial riba e tema di maneho di capital institucional. Ta p’esey nan tin tur capacidad pa balora e riesgonan specifico y e oportunidadnan pa APFA. Russell Investment ta den su rol di “Fiduciair Manager” mas cu un persona di confiansa y nan ta pensa hunto cu APFA pa e desaroyo di e capital completo y e grado di cobertura di APFA. Tambe State Street Global Advisors ta fungi como e ‘guardian’ pa APFA. Esey ta encera cu nan ta controla y balora e inversionnan y ta vigila cu e portafolio ta cumpli cu regla socialmente responsabel.

Stichting Algemeen Pensioenfonds Aruba
Seroe Blanco 4, Oranjestad, Aruba
T.(297) 525 2732 F.(297) 525 2727
info@apfaruba.org