Claridad tocante fondo di pensioen

Mundialmente e fondonan di pensioen tabatin problema cu e crisis financiero, igual a pasa APFA. APFA a haya su mes cu inversionnan cu a perde balor y cu un tasa di interes mas abou. Ademas nos ta birando mas bieu. Esaki logicamente ta agradabel, pero consecuencia ta cu nos ta haya pensioen pa un periodo mas largo y APFA mester paga pensioen pa un periodo mas largo. E desaroyonan aki a conduci na un grado di cobertura (mucho) abou pa e areglonan anterior di PVL y NPR 2011. Cu e introduccion di areglo NPR 2014, a dicidi pa mehora e grado di cobertura te un nivel di 100% bruto. Di un banda esaki ta tuma luga door di aumenta/hisa edad di pensioen y di otro banda door di un extra contribucion, di un solo biaha, di e dunado di trabou. Pa por cumpli cu tur futuro obligacion di pensioen, e grado di cobertura bruto di e fondo di e pensioen mester ta minimo 100%.

Historia di e areglonan di pensioen

E prome areglo di pensioen cu APFA a maneha tabata e Ordenansa Nacional di trahado di Gobierno (PVL). Door cu a mustra cu PVL no tabata financieramente sostenibel mas, a dicidi na 2005, pa introduci un Areglo di Pensioen Nobo (NPR 2005). E areglo tabata aplicabel pa tur participante cu a cuminsa traha desde 1 di mei 2005, na un dunado di trabou cu tabata afilia na APFA.
Di e forma aki por considera NPR 2005 como e precursor di NPR 2011. Riba 1 di januari 2011, e areglo aki a reemplasa e areglo di PVL; tur participante di PVL y mayoria participante di NPR 2005, a keda traspasa pa e areglo NPR 2011 (eventualmente cu un areglo transitorio). E deficit cu tabata existi den e areglo bieu di PVL, a pasa pa NPR 2011, locual a causa cu NPR 2011 a start cu un subcobertura. A haci palabracion pa mehora e posicion financiero di e areglo. Na 2014 e dunadonan di trabou y e sindicatonan, a dicidi pa introduci un areglo nobo cu forsa retroactivo for di 1 di januari 2014. E areglo aki, NPR 2014, ta reemplasa NPR 2011 completamente. Si tin, pa cierto grupo di participante, un areglo transitorio pa cierto aspecto, manera baha mas trempan cu pensioen.

NPR 2014 ta cuminsa cu un base financiero nobo

Na un otro caminda riba e website aki bo por lesa tocante e contenido di NPR 2014. Wak pa esaki ‘Mi areglo di pensioen’.

A hiba e grado di cobertura bruto pa e areglo nobo, riba un nivel di 100% den 2014. Esaki di un banda ta bay door di aumenta/hisa e edad di pensioen. Den NPR 2011, esaki tabata 60 aña y awo gradualmente e ta bay te 65 aña, mescos cu e edad di AOV na Aruba. Door cu e participantenan ta spaar mas tempo pa pensioen y e pagamento di pensioen ta tarda mas, e posicion financiero di e areglo ta mehora. Banda di esaki tambe tin palabracion cu e dunado di trabou, cu lo haci un pago di un solo biaha, pa trece e grado di cobertura riba un nivel di 100%. Cu e pago di un solo biaha aki, e garantia di pais Aruba pa cubri e deficitnan den futuro, a keda cancela. Si den futuro e grado di cobertura baha bou 100%, e dunadonan di trabou y e sindicatonan hunto, mester yega na un solucion. Den un caso extremo, directiva di APFA por dicidi di corta den cierto pensioen of derecho adkiri.
Cu un grado di cobertura di 100% bruto , ainda APFA no ta cumpli cu e exigencianan di Banco Central di Aruba. P’esey mester traha un plan di recuperacion riba termino largo.

Lesa mas di e plan di recuperacion NPR 2014

Stichting Algemeen Pensioenfonds Aruba
Seroe Blanco 4, Oranjestad, Aruba
T.(297) 525 2732 F.(297) 525 2727
info@apfaruba.org